Германскиот министер за надворешни работи Хаjко Мас оцени дека на руските власти би можело да им се воведат санкции, доколку во следните неколку дена не успеат да ги разјаснат околностите за труењето на опозицискиот лидер Алексеј Навални.
„ Доколку нема придонес од руска страна во следните неколку дена, ќе треба да разговараме за одговорот со нашите партнери“, рече Мас за неделното издание на списанието „Билд“.
„ Кога размислуваме за санкциите, тие треба да бидат насочени што е можно подобро“, додаде Мас.
Германската канцеларка Ангела Меркел минатата недела објави дека Навални е затруен со забранетиот нервен агенс „новичок“, што исто така се користеше во случајот со обидот за убиство на Сергеј Скрипал во 2018 година во Велика Британија.
Навални се лекува во болница во Берлин, затоа што му се слоши на летот кон Москва од сибирскиот град Томск. Според информациите од болницата, неговата состојба се подобрува, со проценка дека „заздравувањето ќе трае долго“.
