По формирањето нова влада поради оставката на премиерот Шинзо Абе, Јапонија ќе разгледа како да продолжи со преговорите за мировен договор со Русија, објави министерот за надворешни работи, Тошимицу Мотеги, на прес-конференција во Токио, пренесува ТАСС.
Според Мотеги, кога ќе биде одобрена новата влада Јапонија ќе размисли како да продолжи да преговара за мировен договор и како да ја унапреди економската соработка. Тој додаде дека за време на мандатот на Абе како шеф на јапонската влада се постигнати специфични резултати во преговорите со Русија.
На 28 август, јапонскиот премиер Шинзо Абе објави дека поднесува оставка од здравствени причини.
„ За политичарот е најважно да покаже резултати. Јас ги вложив сите напори во ова за овие седум години и осум месеци. Политичарот не може да си дозволи грешки предизвикани од неговото лошо здравје. Поднесувам оставка како премиер”, рече тој.
Шинзо Абе ја предводеше Јапонија како претседател на Либералдемократската партија од декември 2012 година. Овој месец, тој го собори претходниот рекорд и стана премиер со најдолг стаж во историјата на Јапонија.
Изборите за нов лидер на партијата се очекува да се одржат месецов. Традицијата налага премиерската функција да ја преземе лидерот на владејачката партија по гласањето во парламентот.
