Мегајахтата Лејди ММ во вторникот се запалила во меѓународните води, на околу 50 километри од Сардинија.
На јахтата имало 17 лица, девет члена на екипажот и осум гости. Сите тие се спасени и се чувствуваат добро. Капетанот на јахтата бил од Хрватска, исто како и пет други членови на екипажот.
Противпоарниот аларм на јахтата се огласил околу 6 часот. Капетанот веднаш ја известил крајбрежната стража и наредил затворање на резервоарите кои имале повеќе од 70.000 литри дизел, со што се избегнала уште поголема еколошка катастрофа.
Веднаш започнала акција за спасување во која учествувале два брода и хеликоптер. Спасувачите по доаѓањето го виделе само бродот во оган, но не затекнале никого. Јахтата брзо потонала, а подоцна се дознало дека екипажот и патниците го напуштиле бродот со спасивачки чамец и дека сите биле живи. Нив ги пресретнале бродови и ги одвеле на сигурно.
Лејди ММ била луксузна јахта долга 48 метри изработена во Италија и закотвена во Анкона. Таа пловела под знамето на Кајманските острови.
