Грција има намера да го искористи своето право за проширување на територијалните води долж западниот брег на Јонското Море од шест на 12 наутички милји, најави премиерот.
Киријакос Мицотакис им го кажа тоа на пратениците во парламентот кои треба да го одобрат договорот за поморските граници меѓу Грција и Италија и посебниот договор со Египет.
„Со законот што ќе биде доставен до парламентот за усвојување, Грција ќе ги прошири своите западни територијални води од шест на 12 наутички милји“, рече Мицотакис.
Планираното проширување на територијалните води во Јонското Море нема директно да влијае на грчко-турскиот спор за правата на водите во источниот Медитеран, според АП.
Мицотакис истакна дека Грција ја напушта повеќедецениската „пасивна“ надворешна политика.
