Во Австрија, женски членови на владата неодамна беа изложени на закани преку интернет.
Прво, министерката за правда Алма Задиќ доби смртни закани, потоа министерката за интеграција Сузана Раб, а сега и министерката за одбрана Клаудија Танер.
Сите три политичарки добија лично обезбедување поради заканите.
Министерката Танер беше изложена на навредливи, сексистички напади од Австриец, кој и се закани со смрт.
Осомничениот е пронајден, а министерката доби засилено обезбедување, како лично, така и во приватен дом.
Заканите биле направени откако Танер поставила објава од парламентот на нејзината страница на „Фејсбук“.
Само неколку минути подоцна, 35-годишен Австриец напишал низа коментари полни со омраза, со јасни закани со смрт.
Воената разузнавачка служба и Федералната служба за борба против тероризмот веднаш се вклучиле во пронаоѓањето на лицето кое се заканувало и успеале да утврдат за кого станува збор.
Како што беше најавено, против него е поднесена кривична пријава.
