Покрај секојдневните театри на Зоран Заев и СДСМ околу формирањето на парламентарното мнозинство, покрај секојдневното занимавање на власта со помалку или повеќе пикантерии, жолт печат и неосновани обвинувања, животот станува се потежок, а економијата влегува во се потешка, поакутна фаза. Ова го изјави на прес-конференција лидерот на ВМРО-ДПМНЕ, Христијан Мицкоски.
Како што рече, додека власта ги обвинува граѓаните за повисока цена на струја и ги прекорува дека плаќале повеќе за интернет и телефонија, стотици луѓе живеат со помалку од 50 денари дневно.
„Повисоките цени на електрична енергија не само што го оптоварува животниот стандард туку директно ги прави луѓето посиромашни. И бидете сигурни зад повисоката цена на електричната енергија седат бизнис интереси на семејството на власт. Со кое што подетално ќе се занимаваме следните денови. Она што вистински загрижува е што Владата веднаш по изборите економијата ја доведе во колапс. И тоа е последица на серијата погрешни одлуки, на нерационалното трошење на евробврзницата насочена кон досега најголемиот институционален поткуп за време на изборен процес. Цената се плаќа денес. Бизнисот тоне. Банкарскиот и финансискиот сектор е пред распад. А, власта целокупната енергија ја насочува кон зачувување на своите фотелји и бизниси“, изјави Мицкоски.
Тој оцени дека Македонија е во економска криза, која е најдлабока досега. Во период од шест месеци, индустриското производство споредено со истиот период од 2019-тата година бележи пад од цели 14,6 проценти, рече Мицкоски. Во истиот период, како што посочи, бројот на работниците во индустријата е намален за 4,4% споредено со лани.
Во однос на стоковата размена со странство, претседателот на ВМРО-ДПМНЕ вели дека извозот за шест месеци бележи опаѓање за цели 22,3%, а увозот за цели 18,1%.
Тој спомена и дека државниот долг од 4,5 милијарди евра пораснал за 982 милиони евра, или тоа е 8,9% од претпоставениот раст или претпоставенатa вредност на БДП на крајот од годината, во период од три месеци. Јавниот долг, пак, е зголемен од 5,56 милијарди евра на 6,527 милијарди евра, или за цели 967 милиони евра со тоа што јавниот долг е зголемен за 8,8% номинално, во однос на Бруто Домашниот Производ кој што треба на крајот од годината да изнесува приближно 11 милијарди евра, додава Мицкоски.
