Кабинетот на францускиот претседател, Емануел Макрон, потврди дека француски државјани, хуманитарни работници од НВО АЦТЕД, се убиени во напад во Нигер, западна Африка, пренесува „ЦГТН Африка“.
Во соопштението се наведува дека Макрон телефонски разговарал со нигерискиот претседател Махамад Исуфу.
Напаѓачи на мотоцикли вчера убиле шестмина француски државјани и нивните нигериски водич и возач во национален парк во регионот Куре во Нигер, соопшти висок официјален претставник и безбедносен извор. Сè уште не е јасно кој стои зад нападот, но џихадистичките групи стануваат се поактивни во Нигер.
Француската влада советува да не се патува во големи делови на Нигер, поранешна француска колонија. Заканата од тероризам, особено надвор од главниот град Ниами и во близина на границите, е голема, велат од француската влада.
Милитантните групи, вклучително и Боко харам, дејствуваат во областа и насилството од страна на групи поврзани со Ал каеда и Исламската држава е во пораст во регионот Сахел.
Франција ја предводи коалицијата од западноафрикански и европските сојузници против исламистичките милитанти во регионот од јуни.
