Американскиот Стејт департмент денеска воведе санкции за Хафез Асад, најстариот син на сирискиот претседател, Башар ал Асад.
Покрај тоа, Министерството за финансии на САД објави дека вовело санкции кон истакнатиот сириски бизнисмен Васим ал-Катан и девет други субјекти, поради наводно зајакнување на сирискиот режим преку изградба на луксузен недвижен имот.
Санкциите на Министерството за финансии се последица на законот познат како Закон Цезар, за заштита на сириските цивили, а именуван по псевдонимот што го користел сириски полицаец, кој предал фотографии од илјадници жртви на тортурата на владата на Асад, тврди агенцијата АП.
Законот казнува поединци и компании кои учествуваат во деловни активности со сириската влада.
Ова е првпат да бидат воведени санкции за некое од трите деца на Асад.
Хафез Асад е роден во 2001 година и е најстарото дете на сирискиот претседател.
