Тројца професори во Универзитетот за медицина во Саутемптон направија голем исчекор во лекувањето на пациентите заболени од коронавирус, па истовремено станаа и милионери преку ноќ.
Пред две децении, српскиот доктор и професор Ратко Џукановиќ, заедно со колегите Стивен Хојгејт и Дона Дејвис откриле дека протеинот интерферон бета, кој помага кај настинките, им недостига на оние кои боледуваат од астма и хронични болести на белите дробови.
На основа на тоа нивната фирма развила негова замена која им помага на пациентите со вирусни заболувања, пишува „Гардијан“.
Клиничката студија на нивниот лек СНГ001, базирана на интерферонот бета, е завршена пред неколку дена и покажала дека пациентите заразени со вирусот ковид-19 имаат две до три пати поголеми шанси за закрепнување со оваа терапија отколку со плацебо.
На примерок од 101 заболен е утврдено дека шансите за развој на тежок облик на болест се помали за 79 отсто додека чувството на губење на здив исто така е драстично намалено.
Директорот на компанијата, Ричард Марсден е пресреќен поради резултатите.
„ За нив нема ништо подобро од тоа кога ќе видат дека нивниот лек ги лекува вистинските пациенти, а притоа заработува пари“ рекол Марсден, откако акциите на неговата компанија скокнале за 540 проценти неколку часа по објавувањето на резултатите од студијата на 21 јули.
Од почетокот на годината, вредноста на овие акции пораснала за неверојатни 3.000 проценти.
Со оглед дека тројцата научиници имаат удел во компанијата, тие практично преку ноќ станаа милионери. Па така 0,56 отсто од акциите на докторот Џукановиќ сега вредат 1,6 милиони фунти ( околу 1,75 милиони евра).
Клиничката студија е проширена на пациенти со поблаги облици на болеста.
