Украинската полиција уапси осомничени соучесници на човекот кој држеше 13 лица како заложници во градот Луцк, соопшти главниот портпарол на украинското Министерство за внатрешни работи, Артјом Шевченко, пренесува ТАСС.
„Лица со одредени врски со гавниот осомничен] беа приведени во Харков“, рече портпаролот, без да даде дополнителни информации.
Во меѓувреме, „Њузрум“ објави, повикувајќи се на сопствени полициски извори, дека 43-годишен осомничен соучесник е приведен во заедничка операција од полицијата и Службата за безбедност на Украина.
Прелиминарните информации сугерираат дека човекот кој го киднапираше автобусот во Луцк претходно испратил пакет до неговиот соучесник во Харков. При претресот на неговиот стан, полициските службеници заплениле неколку гранати Ф-1 и РГД, пиштоли ТТ со придушувач и шаржери со муниција.
„Во моментот полицијата и Службата за безбедност на Украина го пребаруваат местото каде што живее оваа личност. Иследниците го сослушуваат притвореникот“, соопшти полицијата.
Министерот за внатрешни работи на Украина, Арсен Аваков, подоцна ја потврди информацијата, но не образложи за бројот на притворените соучесници.
.
