Русија спроведува кампањи за дезинформации и се обидува да наметне политичко влијание особено преку работењето на каналот РТ и новинската агенција „Спутник“, тврди извештајот на Комитетот за разузнавање и безбедност на британскиот парламент, објавен денеска.
„Руското промовирање на дезинформациите и нејзините обиди за пошироко политичко влијание е масовно присутно. Примерите вклучуваат: употреба на државните традиционални медиуми: опен-сорс студиите покажаа сериозни нарушувања во известувањата на руските државни радиодифузери како РТ и Спутник “, се вели во извештајот.
Покрај тоа, во документот се забележува дека комитетот укажува на употреба на ботови и тролови на социјалните мрежи, операции како хакирање и протекување и реално политичко мешање.
Минатиот јули Офком, британскиот регулатор за медиуми, ја казни РТ со 200.000 фунти тврдејќи дека ги прекршила правилата на непристрасност и точност во голем број извештаи и програми што го покриваа труењето на поранешниот рускиот разузнавач Сергеј Скрипал и неговата ќерка Јулија во Солсбери како и вооружениот конфликт во Сирија.
Во март 2020 година, Врховниот суд во Лондон го отфрли барањето на РТ да ја поништи паричната казна и да ги прифати тврдењата на каналот дека непристрасноста е во спротивност со принципот на слободно изразување на мислења.
