На денот на изборите во земјава, веднаш откако заврши гласањето, во идентичен период кога требаше да се објави конечната излезност на изборите и првичните резултати, истовремено падна сајтот на ДИК и најчитаниот агрегатор на вести во земјава, time.mk.
Како што напиша на својот Твитер профил, сопственикот на Тајм.мк, Игор Трајковски, нападот почнал нешто по 22:00 часот и во него постепено биле ангажирани над 35 милиони IP адреси кои генерирале илјадници кликови во секунда.
„Имаше кратки прекини на работењето но претежно сајтот издржа. Тоа е прв дел кој немам докази дека е поврзан со вториот дел од нападот кој заврши со преземање на нашиот сервер. За жал, немавме најдобра заштита, наша грешка, која ја поправивме да не се повтори“, напиша Трајковски.
Тој потоа додаде дека е сигурен оти самото преземање на сајтот, односно вториот дел од нападот е поврзано со некој од сајтовите што агрегаторот ги индексира.
„За вториот дел со сигурност тврдам дека е некој поврзан со некој од сајтовите кои ги индексираме, поради тоа што само така можат да ни ја дознаат ip адресата. Но, да ни беше сè направено според “Security 101”, како што пишал напаѓачот, немаше да биде проблем. Ќе учиме во од“, соопшти Трајковски на Твитер.
Една кратка изјава за што знаеме до сега.
Нешто после 22:00h започна DDOS напад на https://t.co/tCteO399I2, во кој постепено беа ангажирани над 35.000.000 ip адреси кои генерираа илјадници “кликови” во секунда. Имаше кратки прекини на работењето но претежно сајтот издржа. 1/3— Igor Trajkovski (@mkrobot) July 16, 2020
Вториот дел од нападот се случи околу еден часот по полноќ, во изборната ноќ кога веб-страницата на агрегаторот Тајм.мк беше преземена и при нејзиното отворање се прикажуваше фотографија со порака од еден од напаѓачите. Пораката беше со политичка содржина, и беше потпишана од Anonopsmkd. Она што е интересно е дека првиот дел од пораката беше на англиски јазик, и беше наменеата за читателите. Потоа имаше текст на македонски јазик, кој имаше политичко-партиска содржина, за на крајот да заврши повторно со текст на англиски јазик и тоа со лична порака до Трајковски, односно @mkrobot.
Во моментов агрегаторот функционира нормално, што не може да се каже за сајтот на Државната изборна комисија rezultati.sec.mk кој сè уште не функционира и не можат да се видат детално резултатите од изборите. На вчерашната прес-конференција беа соопштени неофицијалните резултати, а од ДИК информираа дека случајот за кој претпоставуваат дека е надворешен напад, е пријавен во Министерството за внатрешни работи.
