Младинскиот културен центар во Скопје на 10 и 11 јули ќе организира бесплатно кино на отворено во паркот пред МКЦ. Проекциите почнуваат од 21 часот, а бројот на места е ограничен во согласност со мерките за заштита од ковид-19.
„Доколку сакате да имаме културна програма ова лето, Ве молиме грижете се за себе и другите. Придржувајте се до мерките и протоколите“, порачуваат од МКЦ.
Во петок, 10 јули, на репертоарот ќе биде прикажан филмот „Куќата што ја изгради Џек“ на режисерот Ларс фон Трир. Во сабота, 11 јули, љубителите на филмот ќе можат да го проследат „Всушност, никогаш не беше тука“ на режисерот Лин Ремзи.
Од МКЦ информираат дека филмските проекции ќе бидат реализирани по соодветен протокол, запазувајќи ги препорачаните мерки за заштита. Информации за начинот на набавка на бесплатните билети ќе бидат објавени во текот на денов на страницата за настанот на Фејсбук.
