Изминативе 30 години се изнаслушавме безброј лажни ветувања од левичарите и десничарите, а ветувањата се потполно исти, рече на денешната прес-конференција Петар Богојески од Македонски концепт, носител на листа во првата изборна единица.
„Можам само да констатирам дека нема разлика помеѓу господин Заев и господин Мицкоски, со една забелешка дека Мицкоски е најдобриот лидер на опозиција, но само за Заев, а не и за Македонија. Сите ние сакаме промена на власта во Македонија, но тоа нема да се случи ако гласате за Мицкоски и нема да биде симната елитата која 30 години го прави истото со нашата држава“, посочи претставникот на Македонски концепт.
Како што кажа Богојески, тоа што криминалците политичари не одговараат пред законот најмногу им одговара на овие двајца лидери, а со тоа само се продолжува злоупотребата на јавните политички функции за семејно богатење.
„Наместо лаги и лични интереси, сите ние од Македонски концепт се залагаме за казнивост на политичарите, политичка одговорност, кривично дело – лажно политичко ветување и финансиска лустрација на политичарите, функционерите и сите што се на јавни функции почнувајќи од мене. Со вакви закони ќе дојдеме до вистински граѓански парламент кој што ќе работи во функција на граѓаните и само за интересите на граѓаните. Само гласот за број 10 е глас за победа на граѓаните врз политичарите”, заклучи Богојески.
