Скопје, 17 јуни 2020 (МИА) – Во функција е веб платформа solidarnost.gov.mk преку која граѓаните и фирмите можат брзо и едноставно да донираат во солидарните фондови за борба против КОВИД-19 на Министерството за здравство и Владата и да се запишат како донатори.
Целта на новоотворената веб-страница е да се олесни процесот за оние кои што сакаат да донираат за полесно справување со кризата предизвикана од коронавирусот, како и да овозможи јавно признание на тие кои донирале и да поттикнува солидарност, соопшти Министерството за финансии кое ја изготви платформата во соработка со Меѓународниот републиканскиот институт (ИРИ), УСАИД, како и со поддршка на Министерството за здравство и Владата.
Досега во двата фонда, на МЗ и на Владата, се собрани околу 200 милиони денари. Дополнително, информира министерката за финансии Нина Ангеловска, е креирана платформа за едноставен и брз придонес, на секој кој може, да се приклучи во борбата против КОВИД-19. – Solidarnost.gov.mk на брз и едноставен начин дава можност на сите граѓани и фирми да подадат рака во надминување на овој предизвик и да донираат, како и да се запишат во листата на донатори на страната. Донациите во двата солидарни фонда соодветно се наменети за набавка на опрема за здравството и за социо-економски мерки за поддршка на повеќе категории на граѓани на кои им е потребна помош, наведува Ангеловска во пишана изјава.
Од Министерството за финансии информираат дека од досега собраните средства во фондот на Министерството за здравство, во кој донирале граѓани, компании и амбасади на странски држави, набавени се материјали и опрема за монтажната болница која го зголемува капацитетот на Инфективната клиника за повеќе од 70 кревети.
Ресорниот министер Венко Филипче истакнува дека тоа е еден капацитет, кој што значајно помага во сместувањето дополнителен број пациенти, но и понатаму пријатно да се чувствуваат и сите кои работат со пациентите на коишто им е многу потребна лекарската помош. – Со останатите средства продолжуваме понатаму. Сакаме да набавиме и медицинска опрема за инфективните одделенија, не само во Скопје, туку и ширум земјата. Понатаму, во периодот што следи, сакаме да набавиме дигитални рендген апарати, дополнителен број респираторни машини, апарати за компјутерска томографија. Оваа донаторска сметка на која што се собра сериозна сума на пари е нешто што ќе го искористиме за дополнително да се зајакне еден многу важен сегмент во нашиот здравствен систем, а тоа се токму одделенијата за интензивна нега во сите болници – општи, специјални, клинички и на Клиниката за инфективни болести во Скопје за да се зголеми квалитетот на здравствената заштита за нашите пациенти, ја пренесува МФ изјавата на министерот Филипче.
Како што појаснуваат од Министерството за финансии, средствата што се донираат на сметката на Владата, пак, се наменети за социо-економски мерки и всушност претставуваат директна помош од човек на човек и подавање рака на оние категории граѓани кои што се најмногу погодени од кризата.
-Средствата од Солидарниот фонд на Владата ќе се наменат за повеќе категории граѓани на кои им е потребна помош. Ќе се користат за уметници, филмски работници, други самостојни културни работници, физички лица кои вршат авторски ангажмани во областа на културата за помош во справување со корона кризата, радиодифузерите, како и за помош и поддршка на микро, малите, средните и големите претпријатија кои ги трпат економските последици, информира Драги Рашковски, генерален секретар на Владата.
Како што појаснува Министерството за финансии, преку solidarnost.gov.mk сите домашни и странски, правни и физички лица, можат да донираат финансиски средства кои ќе бидат наменети за помош и поддршка на оние кои се директно погодени од кризата, а сите донации кои ќе се уплаќаат преку оваа донаторска платформа, ќе бидат ослободени од банкарски трошоци, благодарение на донацијата на УНИБанка. За секоја донација физичките и правните лица можат да остварат даночно поттикнување преку електронско или хартиено доставување на потребната документација до Управата за јавни приходи, најдоцна до 31 јануари во годината откога ги донирале средствата.
Меѓу другото, укажува МФ, solidarnost.gov.mk има цел и да оддаде јавно признание и благодарност кон сите оние кои што оствариле донација за помош и поддршка во справувањето со последиците од корона кризата, па така, при донирањето, физичките лица имаат можност да одберат дали нивното име и презиме и град ќе бидат јавно објавени на страната. Согласно со Законот за заштита на личните податоци, заштитени се личните податоци на сите оние донатори кои не сакаат нивните податоци да бидат објавени јавно.лв/скс/
