Куманово, 9 јуни 2020 (МИА) – По пауза од неколку месеци, општина Куманово продолжи со отстранување на времени објекти-бараки на улиците „11 Октомври“ и „11 Ноември“. Објектите се отстрануваат бидејќи ќе се проширува улицата „11 Ноември“, соопштија денеска од секторот за инспекциски надзор.
– Во тек е отстранување на времените објекти (бараки) на улица „11 Октомври“, со цел да се реконструира кракот на улица „11 Ноември“ кој е од суштинско значење за намалување на метежот во сообраќајот на улицата „11 Октомври“, на локација кај старата џамија, објави на социјалните мрежи кумановскиот градоначалник, Максим Димитриевски.
Претходно акцијата за отстранување на објектите почна во декември, минатата година. На тој дел од Куманово има 24 времени објекти од кои сите, освен, два се во сопственост на јавното претпријатие за стопанисување со станбен и деловен простор. Раководителот на одделението за инспекциски надзор, Бобан Бојковски, информираше дека постапките за отстранување за објектите, сопственост на ЈП за стопанисување со станбен и деловен простор се завршени минатата година, а завршени е и постапката за двата објекти кои се во приватна сопственост.
– Се очекува отстранувањето на објектите да заврши до крајот на неделава. Времените објекти ќе бидат пренесени на добиточниот пазар, изјави Бојковски.
Минатата година, поради проширување на улицата „Гоце Делчев“ и изградба на автобуски постојки беа отстранети четири времени објекти. ам/сст/
