Струмица, 2 јуни 2020 (МИА) – На првиот ден од објавувањето на јавниот оглас за субвенционирање за купување нов велосипед од страна на Општина Струмица 52 граѓани поднеле апликации за субвениции, соопштија од Општината.
-Вчера до 16 часот, 52 граѓани поднеле апликации за субвенции, а во текот на денешниот ден бројката на заинтересирани постојано расте, информираат од локалната самоуправа.
Градоначалникот на Струмица, Коста Јаневски вчера соопшти дека субвенцинирањето е до максимални четири илјади денари, односно до исцрпување на средствата што се определени за таа намена. Вкупниот износ што ќе го субвенционира општината изнесува околу 800 илјади денари, а оваа мерка ќе важи до 30 септември годинава. Јавниот повик се реализира по принципот „прв дојден, прв услужен“. рт/ев/
