Крушево, 26 мај 2020 (МИА) – Започна изградбата на резервоар за вода во крушевското село Белушино. Проектот треба да обезбеди доволно вода за ова населено место и да го реши проблемот со водоснабдувањето.
Според крушевскиот градоначалник Томе Христоски, изградбата на резервоарот за вода чини 2.601.900 денари, а имплементацијата е во рамки на програмата за работа на Министерството за транспорт и врски.
-Резервоарот за вода во Белушино е ветуван со децении, но еве дури денес се реализира. Ова населено место е без резервоар и се соочува со проблеми со водоснабдувањето, но набргу проблемот ќе биде решен. По се, жителите имаа големо трпение. Конечно нивните барања се реализираат, рече Христоски. ем/хс/
