Латино ѕвездата Шакира ја отфрли спогодбата за признавање вина, која ѝ ја понуди обвинителот во Шпанија за случајот даночна измама од 14.5 милиони евра, и сега е чекор поблиску до судење, соопшти нејзиниот тим за медиуми во средата.
Колумбиската пејачка – која продаде повеќе од 80 милиони плочи ширум светот со хитови како Hips Don’t Lie – отсекогаш ги исполнувала сите нејзини даночни обврски, се наведува во соопштението. Таа го смета случајот за „целосно кршење на нејзините права“.
„Пејачката е убедена во својата невиност и затоа не ја прифаќа спогодбата.“
Условите на предложената спогодба не се откриени. Државното обвинителство во Барселона не одговори на барањето за коментар.
Шакира е обвинета за затајување данок. Според обвинителите, Колумбијката не платила данок во износ од 14.5 милиони евра за периодот од 2012 до 2014 година, период во кој адвокатите на Шакира тврдат дека таа не живеела во Шпанија.
Судот допрва треба официјално да ја испрати на судење и да одреди датум.