По повеќе од еден месец строги мерки поради пандемијата на коронавирус, Чешка го укина полицискиот час. Од денеска се отворени продавниците и трговските центри, рестораните, музеите, галериите, спортските објекти…
Вчера во Чешка беа потврдени 4.563 нови случаи на Ковид-19, што е за 365 помалку од претходната среда, а 50 лица починале, со што вкупниот број на жртви достигна 8.515, според новата статистика на Министерството за здравство на Чешка.
Премиерот, Андреј Бабиќ, апелираше до Чесите да не ги користат веднаш сите придобивки од ова големо отворање, бидејќи иако епидемиолошката состојба е многу подобра од најлошите денови во ноември, кога беа откривани по околу 16.000 нови случаи дневно и над 200 луѓе умираа секој ден, епидемијата не се забавува толку брзо како што се надевала владата.
Од денес, во Чешка е укинат полицискиот час и забраната за пиење алкохол на отворено, на 50 лица им е дозволено да се собираат надвор, а не на шест како порано.
Утрово беа отворени сите продавници, без исклучоци, почитувајќи ја мерката дека е дозволен влез на едно лице на 15 метри квадратни.
Рестораните смеат да работат со преполовен капацитет, а на една маса може да седат најмногу четири лица. На угостителските објекти им е дозволено да работат до 22 часот.
Министерот за здравство, Јан Блатни, најави дека ако епидемијата повторно се забрза, ќе бидат вратени поострите мерки.
