Кавадарци, 15 април 2020 (МИА) – Волонтери на Црвен крст Кавадарци, како дел од мобилните услужни тимови на организацијата, вршат достава на пакети со храна, хигиенски производи и лекови за социјално загрозени стари лица и лекови за изолирани лица, сместени во хотели на територија на општината, информираа од Општинската организација на Црвен крст Кавадарци.
Дистрибуирани се пакети на најранливи категории на лица, стари и изнемоштени, меѓу кои и на возрасно лице на кое му изгоре куќата и живее во многу тешки услови.
– Исто така вршиме и достава на лекови за лица кои се лекуваат од тешки и други болести, што се доставуваат до нашата организација од волонтери на ЦКГС, а истите потоа лично се носат на домашна адреса на лицата за кои се адресирани, соопштија од кавадаречкиот Црвен крст
.Оттаму нагласија дека целта на нивното дејствување во овие вонредни услови е за барем малку да ја ублажат состојбата на најранливите категории на лица во општините Кавадарци и Росоман.свд/см/
