Законски утврдените рокови се испочитуваа, 15 илјади ученици од четврта година пријавија матура што укажува дека најголем дел од учениците се припремаат за матура, вели министерката за образование Мила Царовска.
„Сакаме секое дете да има можност да ги оствари своите цели и соништа, и секако да нагласам дека матурата е законска обврска што значи заокружување на образовниот процес или добивање на диплома што понатаму важи и за продолжување на образованието и за вклучување на пазарот на трудот“, рече Царовска.
Таа претходно изјави дека само учениците од една скопска гимназија имаат организиран бојкот на наставата, додека другите се помали изолирани групи, а во некои средни училишта воопшто нема бојкот.
Од наредната година таа најавува дека ќе има соработка меѓу Министерството и средношколците за подготвување на тоа како ќе изгледа новата концепција за матурата.
