Битола, 20 март 2020 (МИА) – АД ЕСМ во соработка со Синдикалната организација на компанијата и Синдикатот на РЕК Битола испрати хуманитарна помош за 1.000 семејства во Дебар.
-Во Дебар е седиштето на нашата хидроцентрала Шпилје и ние чувствуваме морална одговорност да помгнеме, истакна генералниот директор на АД ЕСМ, Васко Ковачевски.
Тој информира дека се подготвени 1.000 пакети со неопходни прехранбени производи и производи за лична хигиена. Во секој пакет има по 25 килограми брашно и други прехранбени производи, но и заштитини маски и средства за дезинфекција.
-Вкупната вредност на хуманитарната помош изнесува околу 3 милиони денари, истакна Ковачевски.
Хуманитарната помош на АД ЕСМ и синдикалните организации ќе ја прими, а потоа распредели градоначалникот на Дебар, Хекуран Дука.
На новинарско прашање во врска со производството на електрична енергија во државата и работата на хидроцентралата Шпилје, првиот човек на АД ЕСМ Ковачевски истакна дека во моментов годишниот план за производство на електрична енергија во целост се исполнува.
-Производството на електрична енергија се одвива согласно планот, а паралелно преземаме активности за да ги заштитиме вработените. АД ЕСМ се однесува одговорно кон сите ресурси, нема зголемена побарувачка на електрична енергија и не увезуваме електрична енергија. Инаку во хидроцентралата Шпилје, работата е организирана во смени од по 12 часа и нема причини за да дојде до застој на производствениот процес, посочи Ковачевски на денешната прес-конференција во Битола. мт/мд/