Кочани, 18 февруари 2019 (МИА) – Амбасадорот на Кралството Холандија, Дирк Јан Коп попладнево ја посети Општина Кочани и оствари средба со градоначалникот Николчо Илијев. На средбата, која е дел од проширената посета на амбасадорот на холандските инвестиции во Кочанско, беа разменети мислења за локалниот стопански амбиент и потребите за поддршка на инвеститорите.
– Со амбасадорот разговаравме за правците и можностите за развој на Кочани, посебно за унапредување на досегашната одлична соработка со холандски инвеститори. Очекуваме воспоставените односи да продолжат со нови инвестиции во земјоделството, но и во планинскиот и бањскиот туризам, истакна градоначалникот Илијев.
Амбасадорот Коп ја потенцираше досегашната успешна соработка на стопански план која резултира со инвестиции од пет холандски фирми во општина Кочани.
Од почетокот на мандатот на амбасадорот Дирк Јан Коп, во септември минатата година, ова е негова прва посета на единица на локалната самоуправа во нашата земја. та/вј/
