Од денеска, сите жители на Франција, без оглед на возраста или здравствената состојба, можат да се вакцинираат против Ковид-19, во време кога државата постепено ги олеснува мерките наметнати поради пандемијата.
„Јас сум целосно убеден дека ќе видиме дека голем број луѓе ќе бидат вакцинирани сега“, изјави Ален Фишер, шеф за вакцинација во француската влада.
Според него, проширувањето на кампањата за вакцинација е клучна фаза за заштита на населението и враќање кон понормален живот, пренесуваат француските агенции.
Французите ќе мораат да бидат стрпливи во очекување на вакцината, бидејќи резервациите за закажување, достапни од четвртокот, постепено пристигнуваат на специјализирани платформи на Интернет, рече министерот за здравство Оливие Веран.
Испораки од 76,7 милиони дози на вакцини се очекуваат во јуни, во споредба со 44,5 милиони примени во мај.
Најмалку една доза од вакцината против Ковид-19, во Франција примиле 25,4 милиони луѓе или 38 проценти од вкупната и 48,4 проценти од возрасната популација.
Две дози примиле околу 10,7 милиони луѓе.
Директорот на Светската здравствена организација за Европа, Ханс Клуге рече дека најмалку 70 проценти од светската популација треба да се вакцинира до крајот на пандемијата, додавајќи дека Европа сè уште е премногу бавна за да го вакцинира своето население.
Во 53 земји кои припаѓаат на Европскиот СЗО, вакцинирани се само 26 проценти од населението, пренесуваат француските агенции.
