„Фејсбук“ на својата страница го забрани негирањето на холокаустот, истакнувајќи ја загриженоста за подемот на антисемитизмот во светот.
„Ако луѓето пребаруваат за холокаустот на ‘Фејсбук’, ќе почнеме да ги насочуваме кон веродостојни извори за да добијат точни информации“, рече првиот човек на социјалната мрежа, Марк Закерберг.
Тој истакна дека често се двоуми помеѓу заштитата на слободата на говорот и ограничувањето на говорот на омраза.
„Да се направи линија помеѓу она што е и она што не е прифатливо не е лесно, но со моменталната состојба во светот мислам дека ова е вистинскиот баланс“, рече тој.
„Фејсбук“ минатата недела објави дека ќе ја отстрани секоја содржина што отворено го поддржува QAnon – теорија на заговор популарна од десницата, која тврди дека со светот управуваат сатански педофили.
„Фејсбук“ исто така ги ограничи намерните дезинформации за коронавирусот, како и содржината насочена кон намалување на одѕивот на гласачите.
