Администрацијата за храна и лекови на САД (ФДА) одобри итна употреба на комбинирана терапија со антитела од страна на фармацевтската компанија „Ели Лили“ во борбата против Ковид-19, соопштија официјални претставници на американската компанија.
Податоците од студијата во доцна фаза, спроведена во јануари, покажаа дека комбинирана терапија на две антитела, бамланивимаб и етезевимаб, помогна да се намали за 70 проценти ризикот од хоспитализација и смрт кај пациенти со лесна или умерена слика на Ковид-19.
Компанијата соопшти дека терапијата ќе биде веднаш достапна на пазарот.
„ 100.000 дози се подготвени и дополнителни 150.000 дози ќе бидат достапни во текот на првиот квартал од оваа година“, се наведува во извештајот на „Ели Лили“ и се додава дека до средината на 2021 година, компанијата, во соработка со една од водечките светски независни компании за биотехнологија, „Амген“ планира да произведе до милион дози етезевимаб за употреба со бамланивимаб.
„ Терапијата е одобрена за третман на лесна до умерена слика на Ковид-19 кај пациенти постари од 12 години, кои имаат висок ризик од развој на сериозна слика Ковид-19 и / или хоспитализација“, се вели во соопштението на компанијата.
