Граѓаните на Тел Авив имаа можност да видат уметничка инсталација, која ја претставува трпезата на Тајната вечера, на која премиерот Бенјамин Нетанјаху седи сам.
Нетанјаху е прикажан во природна големина како се гости на преполната маса.
Инсталацијата, која беше поставена на плоштадот Рабин во центарот на Тел Авив е продолжение на летните протести против израелскиот премиер, на кои илјадници незадоволни граѓани побараа негова оставка поради лошото раководство и економската криза продлабочена поради епидемијата на коронавирусот.
На инсталацијата Нетанјаху е претставен како компулзивен хедонист, кој целосно го загубил реалниот контакт со граѓаните и нивните потреби.
Авторот на инсталацијата, уметникот од Тел Авив, Итаи Залат, во интервју објасни дека инсталацијата е направена од пластични материјали, насликани во живописни бои и дека ја симболизира „тајната вечера за израелската демократија“.
Ова не е прва уметничка инсталација на Итаи Залат што го критикува израелскиот естаблишмент.
