Четворица Саудијци кои учествуваа во убиството на новинарот на „Вашингтон пост“, Џамал Кашоги во Истанбул во 2018 година, поминале обука во САД една година порано врз основа на договор одобрен од Стејт департментот.
Обуката ја одржала групата „Тиер 1“, која е во сопственост на приватната компанија „Серберус Капитал Менаџмент“, и е дизајнирана да ги заштити саудиските лидери, пренесува „Ројтерс“, повикувајќи се на вчерашниот извештај на „Њујорк Тајмс“.
Како одговор на извештајот за медиумите, портпаролот на Стејт департментот Нед Прајс рече дека според законот, тоа министерство не може да коментира за лиценцираните одбранбени активности наведени во извештајот на весникот и дека американската политика кон Саудиска Арабија го нагласува владеењето на правото и почитувањето на човечки права.
Кашоги, кој напиша критички колумни за саудискиот престолонаследник принцот Мохамед бин Салман, беше убиен од тим оперативци поврзани со принцот, а неговото тело распарчено во конзулатот на кралството во Истанбул во октомври 2018 година.
Во извештајот на американската разузнавачка служба од февруари се наведува дека саудискиот престолонаследник ја одобрил операцијата за апсење или убиство на новинари.
Според „Њујорк Тајмс“, директорот на „Серберус“, Луис Бремер, ја потврдил улогата на неговата компанија во обука на четворица членови на тимот за убиството на Кашоги минатата година, но изјавил дека се одговорни Стејт департментот и другите владини агенции за проверка на странски сили обучени на американско тло.
