Воената операција на Русија против Украина е неприфатлива, соопшти денеска турското Министерство за надворешни работи, повикувајќи ја Москва веднаш да стави крај на неправедниот и незаконски потег што ја загрозува глобалната безбедност, пренесуваат агенциите во светот.
Претходно, украинскиот амбасадор во Анкара изјави дека Киев побарал Турција да ги затвори водните патишта на Црното Море за руските бродови и да покаже солидарност со Украина.
„Покрај елиминацијата на договорот од Минск, овој напад е сериозно кршење на меѓународното право и претставува сериозна закана за безбедноста на нашиот регион и светот“, се вели во соопштението на Министерството.
