Скопје, 2 јуни 2020 (МИА) – Најуспешните македонски каратисти, дел од нив освојувачи на европски и светски медали, преку „you tube“ каналот на Карате федерацијата на Македонија, презентираа дел од своите вештини во услови на изолација, спроведуваа модифицирани тренинзи, во спалните и дневните соби, во дворовите, во затворен или отворен простор, секој според можностите, согласно препораките на надлежните институции.
Придобивки од овие активности на КФМ се одржување на спортистите во солидна подготовка; порака до целото население дека секој може да одвои време и простор и да вежба во домашни услови; позитивно влијание на духот кај сите кои ги практикуваат вежбите и кај останатите.
-На овој начин испраќаме порака како здрав спорт, кој е склоп на ментални и физички вежби за јакнење на телото и духот на секој кој го практикува, а сето тоа влијае и на расположението, а пред се на здравјето на сите. Деновиве ќе продолжиме и со помладите спортисти, како и дел од поискусните, кои се активни во услови на изолација, соопштија од КФМ.
Ваквите активности, во услови кога нема натпревари, КФМ ги презентира минатата недела на видео-конференцијата со претседателот Светската карате федерација (WKF), Антонио Еспинос. Оваа идеја се спроведува во некои земји на регионално ниво, па и пошироко. зс/
