Делчево, 15 март 2020 (МИА) – Градоначалникот на општина Делчево Горан Трајковски денеска на прес-конференција најави дека од утре, 16 март, ќе биде зголемена грижата за старите и изнемоштени лица како дел од заштитата против појавата на коронавирусот. За таа цел, следејќи ги препораките од Владата, додаде дека Општина Делчево формира мобилни тимови за помош на сите стари и изнемоштени лица во Општината.
– Сакам да ги информирам граѓаните дека од утре секој граѓанин од наведените категории, кој има потреба од набавка на лекарства, прехранбени производи и средства за хигиена, со цел да не се изложуваат на дополнителен ризик од инфицирање со коронавирус, ќе може телефонски да ги контактираат тимовите, секој работен ден од 8 до 18 часот на следните телефонски броеви – 075 367 927 и 075 367 903. Како одговорна Општина, додавам дека сакаме да помогнеме на нашите сограѓани и уште еднаш апелирам да ги почитувате препораките од Министерството за здравство кои гласат „Заштитете се и останете дома“, рече Трајковски
За да се сочува мирната епидемиолошка состојба, Општина Делчево, како што додаде, досега има преземено низа превентивни мерки со цел спречување на појавата и евентуалното ширење на заразата од коронавирусот.
– Согласно препораките од Министерството за здравство, Општината воведе рестриктивни мерки, во смисла на укинување на приемните денови, задолжителна дезинфекција на просториите на Општина Делчево. Одржан е информативен состанок со претставници од месни и урбани заедници за да се информираат за новиот начин на работа на Општината и да се олесни комуникацијата со граѓаните и навремено да се одговара на нивните барања и потреби. Дезинфекцијата на училиштата и градинката ќе заврши во текот на утрешниот ден, а редовно ќе се мијат и улиците, додаде Трајковски.
Градоначалникот апелирше до сите граѓани да го намалат движењето во институциите, освен за итни и неодложни работи, движењето надвор од своите домови да го сведат на минимум, единствено за неодложни и итни потреби. На сите лица кои биле надвор од територијата на Република Северна Македонија и на граѓаните кои се сомневаат дека имаат симптоми на коронавирус, им препорача да се јават на броевите: Ало докторе 02 15 123, Центар за јавно здравје Кочани 071 373 913. вс/мс/
