Зголемувањето на бројот на новозаразени лица во гостиварско е загрижувачко и потребно е да се спроведат активности за континуирано почитување на мерките за заштита од коронавирус. Ова е оценката на кризниот штаб за подрачјето на Гостивар, која по неколкумесечна пауза, повторно се состана.
Претседателот на Кризниот штаб, Арбен Таравари, на состанокот истакнал дека ситуацијата е сериозна, но под контрола.
Тој најавил како што стои во соопштението дека Гостивар е подготвен на здравствените институции, за вакцинација на населението, да им отстапи свои простории, меѓу кои и спортската сала.
“На денешниот состанок дојдовме до следниве шетири заклучоци: 1. Ситуацијата е сериозна, но под контрола; 2. Апелираме до граѓаните да се придржуваат до препораките на институциите; 3.Апелираме до граѓаните да се вакцинираат, бидејќи вакцинацијата е најдобрата заштита од оваа болест; 4. Општина Гостивар ги отстапува своите капацитети за отворање на нови пунктои за вакцинација на територијата на Гостивар“, изјави градоначалникот на Гостивар, истовремено и претседател на Кризниот штаб во Гостивар, Арбен Таравари.
Во врска со ставањето во карантин на Гостивар, Таравари истакна дека ова не е во надлежност на локалната власт и додека локалните здравствени институции тврдат дека ситуацијата е под контрола, нема потреба од такво нешто.
„Внимателно го слушав директорот на Болницата и претставникот на Здравствениот дом и среќен сум што ситуацијата е под контрола, има капацитет и независно како се гледа однадвор, вакцинација во Гостивар, внатре во Здравствениот дом се одвива без пречки. Ние како општина немаме надлежности за карантинска мерка и додека тоа не го побараат соодветните институции, нема да направиме такво нешто“, додаде Таравари.
