Високата претставничка на ОН за човекови права денеска ги критикуваше резултатите на Талибанците од преземањето на власта во Авганистан, велејќи дека обврските не се совпаѓаат со реалноста на терен, како што е статусот на жените.
Мишел Бачелет пред Советот за човекови права во Женева рече дека Авганистан е во нова и опасна фаза и дека многу жени и припадници на етничките групи и верските заедници се длабоко загрижени за нивните права.
„Важно и спротивно на гаранциите дека Талибанците ќе ги поддржат правата на жените, во последните три недели, жените постепено беа исклучени од јавната сфера“, рече таа во својот говор.
Бачелет изрази изненадување од составот на новата талибанска влада, потенцирајќи го недостатокот на жени и доминацијата на етничките Паштуни.
Таа посочи и на други неисполнети ветувања за амнестија на поранешни државни службеници и службеници за безбедност поврзани со претходната влада и забрана за претрес на куќи.
