Спасувачите сè уште копаат низ урнатините за да стигнат до сите преживеани по нападот на театарот во Мариупол, кој се случи во средата. Досега се извлечени околу 200 лица и се верува дека сите преживеале. Се верува и дека повеќе од 1.000 луѓе се засолниле во објектот.
„Скај њуз“ пишува дека властите не сакаат да зборуваат или да проценат за какви бројки би можело да се работи.
Градоначалникот на Мариупол, Вадим Бојченко изјави дека спасувачките операции и натаму се во тек.
„Потребно ни е повеќе време да дадеме проценки за жртвите и преживеаните. Градот сè уште е нападнат и тоа ја отежнува нашата спасувачка операција“, рече тој.
Украинскиот пратеник Дмитриј Гурин во Мариупол изјави дека неговите родители се заробени во градот.
„Таму сè е во урнатини. Засолништето под театарот има три зони и не знаеме точно каква е состојбата во секоја зона. Се чини дека ниедна не е оштетена, но луѓето не можат да излезат бидејќи не може брзо да се расчисти областа поради постојаните напади. Ситуацијата е многу опасна“, изјави пратеникот Гурин.
