Тирана, 24 април 2020 (МИА) – Пратеникот македонската партија во Албанија, Македонска алијанса за европска интеграција, Васил Стерјовски, на денешната седница на парламентарната комисија за европска интеграција побара од министерот за туризам и животна средина, Бленди Клоси, да помогне во изнаоѓањето пазар за планинскиот чај од општина Пустец.
На седницата, која се одржуваше онлајн, а со која раководеше Рудина Хајдари,претседателка на комисијата, Стерјовски информираше дека земјоделците во општина Пустец последниве години засадуваат планински чај и во моментот се простира на површина од околу 25 хектари.
Но, како што рече, тие не само што се соочуваат со многу пониска цена по килограм,од предходно, туку и со недостиг на пласман на истиот.
-Последниве две години има проблем со продажбата на планинскиот чај. Цената е намалена, од 700 леки (околу 6 евра) за килограм колку што беше пред две години, на 100 леки, но има и недостиг на пазар и во последните две години останати се значителни количини на залиха на планински чај. Моето барање до министерот е да се ангажира за изнаоѓање пласман како во така и надвор од земјата, рече Стерјовски.
Посочи дека ова нормално е и задача на министерството за земјоделство, до кое исто така побарал да се заложи за изнаоѓање пазар за планинскиот чај и решавање на овој проблем на земјоделците од општина Пустец затоа што ова е еден од главните извори на приход за земјоделци во општината.
Министерот Клоси рече дека со заеднички напор со здруженијата на лековити билки и во координација со
министертвото за земјоделство вложуваат напори за обезбедување одредени олеснувања што им се потребни.
-Не сум запознат со конкретниот случај и затоа не можам да коментирам за него. Но, ќе побарам информации од бизнис заедницата и ќе контактирам директно со пратеникот Стерјовски за да го информирам. Тие се автентични производи, тие се производи што сум ги видел сам. Повеќе
пати сум бил со пратеникот во Преспа и сум видел не само планински чај, туку и жалфија и други лековити растенија за кои има голема побарувачка на албанскиот пазар и надвор од него, рече Клоси.
Посочи дека одгледувањето на билки брзо се шири последните години во Албанија, од чија продажба се остварува приход од десеттици милиони евра.вт/бт/
