Велес, 10 јуни 2020 (МИА) – Спомен куќата на Коста Солев Рацин во неговиот роден Велес, како и останатите спомен куќи на Васил Главинов, на Јордан Хаџи Константинов-Џинот и Куќата на Касапови попозната како „Куќата што лебди на карпа“ заедно со Народниот музеј во Велес и музеите од НОВ во селото Горно Врановци и Спомен костурницата од НОВ во Велес, лани имале вкупно 3500 домашни и странски посетители, како и ученици во рамки на ученички екскурзии.
Поради пандемијата со Ковид-19 сите овие спомен куќи скоро три месеци се затворени, а со тоа најмногу финансиски трпи ЛУ Народен музеј од Велес, кој раководи и се грижи за нив.
Во Спомен куќата на Рацин најинтересно посебно за учениците е грнчарското колце, како и збирката на предмети и документи од него.
Спомен куќата на Рацин е најпосетена за време на „Рациновите средби“ и „Детските Рацинови средби“ и други културни манифестации и поетски читања и перформанси кои годинава поради вонредната состојба изостанаа, како и бројни странски делагации и гости во посета на Општина Велес.
Инаку, споредено со претходната 2018 кога имало вкупно 3200 посетители на сите спомен куќи и музеи во Велес и околината, лани имало за околу 300 повеќе или вкупно биле 3500 домашни и странски посетители.ад/фф/
