Скопје, 6 март 2020 (МИА) – Премиерот Оливер Спасовски го прими нерезидентниот амбасадор на Република Ирска за нашата земја Пол Мекгери, и му посака успешен мандат и дипломатски активности во насока на подобрување на целокупната соработка од заеднички интерес за двете земји.
Како што соопшти владината прес-служба, премиерот Спасовски на средбата истакна дека Северна Македонија високо ја цени постојаната поддршка од Република Ирска за нашиот процес на европска интеграција, која застапува став за започнувањето на пристапните преговори колку што е можно по брзо.
-Претседателот на Владата на Северна Македонија Спасовски потенцираше дека извештајот на Европската Комисија е охрабрувачки сигнал дека сите земји членки на ЕУ ќе постигнат согласност за позитивна одлука за отворање на преговорите со нашата земја како признание за реформите и за политичката одговорност на земјата да остане верна на европските вредности и на спроведувањето на договорот од Преспа и на договорот со Бугарија, се наведува во соопштението.
Амбасадорот Мекгери на средбата нагласи дека неговата земја останува силно на ставот дека Северна Македонија ги исполни сите услови за почеток на преговори за членство во ЕУ, и оти е уверен дека до тоа ќе дојде многу бргу со што ќе се отворат и можностите за поинтензивна и сеопфатна соработка меѓу двете земји во повеќе области. вг/лв/
