Аудио приказни за деца „Бесконечно царство“ е нов проект на медиумскиот едукатор Николина Атанасова, во соработка со порталот Glasno.mk. Се работи за авторски приказни од македонски писатели, актери, ентузијасти и креативци, кои децата ќе може да ги слушаат преку Youtube каналот на Атанасова.
„Децата до две години треба да слушаат, но не и да гледаат во екраните. Затоа, идејата е да креираме содржини кои децата ќе ги восприемаат преку аудио. Возраста не е ограничена, може да ги слушаат и деца до осум години. Така тие ќе може да учат нови зборови додека си играат или имаат други активности“ – изјави за „Мета.мк“, Николина Атанасова.
Станува збор за авторски проект, како што вели таа, кој поради финансиски причини и лични обврски, за сега ќе се објавува еднаш месечно.
Денеска во 18 часот е закажана премиерата за првата аудио приказна „Тажниот осамен змеј“.
