Крива Паланка, 9 мај 2020 (МИА) – Вкупно шест детски игралишта се уредени во руралните средини на Општина Кратово, а деновиве се работи на поставување реквизити и на останати локации во општината.
– Станува збор за проект што подолг временски период чека на реализација, а беа пролонгирани роковите поради високите суми на понудувачите на јавните повици со суми и двапати повисоки од предвидената. На мое огромно задоволство успеавме да добиеме добра понуда, за да се уредат што повеќе терени бидејќи детската среќа е бесценета. За уредуавње на детски терени и поставување реквизити одобрени се средства од околу 2,5 милиони денари со вклучен ДДВ од Бирото за регионален развој, изјави градоначалникот на Кратово, Љупчо Бојаџиев.
Според критериумите опфатени се специфични подрачја, така што детските катчиња се уредени во селата Страцин, Шлегово, Трновац, Крилатица, Туралево и Коњух.
– Со оглед на тоа што со предвидената сума во проектот успеавме да набавиме солиден број реквизити, целта ми е и во останатите селски населби каде има повеќе дечиња, да инсталираме барем сегменти, додаде Бојаџиев. ид/мс/
