Се стравува дека стотици дози од вакцината против Ковид-19 пропаднале откако се расипал замрзнувачот во една клиника во Велика Британија. Клиниката во Нортхамптоншир чувала 975 дози од вакцината на Фајзер, која мора да се чува на минус 70 степени, пренесува Дејли Меил.
Клиниката функционира како централен центар за вакцинирање на лица постари од 80 години.Некои пациенти ја примиле дозата во средата на 16 декември, но други требало да ја примат во четвртокот и петокот на клиниката, која работела 12 часа на ден.
Но, во четвртокот, на пациентите им било кажано дека вакцината повеќе не е достапна. Не е јасно колку дози се уништени.
Ова доаѓа откако поранешниот министер за здравство Џереми Хант предупреди дека достапните дози на вакцината Фајзер ќе бидат потрошени во јануари, а новата пратка треба да пристигне до март, што значи дека програмата за вакцинација може да биде запрена.Портпарол на компанијата Фајзер одговори дека новите пратки на вакцината ќе пристигнат пред март, „на почетокот на 2021 година“.
Повеќе од 140.000 Британци веќе ја примија вакцината на Фајзер и Бионтек, откако беше одобрена во таа земја на почетокот на овој месец.
