Кавадарци, 6 мај 2020 (МИА) – Се навршуваат 680 години од осветувањето на Полошкиот манастир „Свети Ѓорѓи“, кој сега се наоѓа близу брегот на втората по големина вештачка акумулација Тиквешко Езеро и до него се стигнува само по воден пат, потсетува историчарот Петре Камчевски.
– Станува збор за еден од најзначајните и најубавите културно-историски споменици од средниот век во Македонија. Полошкиот манастир се наоѓа на дваесетина километри југозападно од Кавадарци и е познат по прекрасно изработениот фрескоживопис, по убавата архитектура, предметите од резба како полиелејот од 1492 година, за кој се смета дека е најстарата датирана резба, големиот крст со распетието од 1584 година, вратите во плитка резба, престижните икони, а имал и богата библиотека која имала повеќе од 50 товари со книги, вели Камчевски.
Во манастирскиот комплекс се изградени и два нови конаци, со можност за развој на туризмот во овој крај. свд/рп/
