Гостивар, 26 февруари 2020 (МИА) – СВР Тетово неделава стартува со повеќе превентивни активности на тема „Спречување на насилно и недостојно однесување на спортски натпрeвари“. Со овие активности планирано е да се опфатат околу три илјади од четврта година во сите средни училишта на полошкото подрачје.
– Во училиштата веќе се одржуваат посебни работилници, односно предавања, на кои интерактивно учествуваат и родители, училишни психолози и педагози. На нив се дебатира за потребата од фер и спортско навивање на фудбалски или други натпревари, но и за законските импликации доколку се иницира или учествува во насилство пред, за време или по завршување на натпреварите, вели Марјан Јосифоски портпарол на СВР Тетово.
На предавањата посебен акцент му е ставен на претстојниот квалификациски натпревар помеѓу фудбалските репрезентации на Република Северна Македонија и Република Косово. Натпреварот е закажан за 26 март годинава и ќе се игра во Скопје, а на кој се најавува присуство на повеќе навивачки групи, меѓу кои и од тетовско-гостиварското подрачје. згм/ев/
