Од денеска, како и во текот на викендот, се до вторник, до завршување на велигденските празнични денови, СВР Охрид ќе прави засилени контроли на сите паркови, излетнички места, места за рекреација во националните паркови и шуми, во викенд-населбите, како и во верските храмови.
„Засилените мерки за контрола на парковите, излетничките места и викенд-населбите почнуваат од денеска во 16 часот и ќе траат до 21 април, вторник, до 5 часот. Дополнително, мерки за контрола ќе се преземаат и околу верските храмови, што е во согласност со одлуката на Владата за продолжување на забраната и посебниот режим на движење за време на претстојниот христијански празник, Велигден. Тие ќе почнат на 17 април, петок, во 16 часот, се до 21 април, вторник, до 5 часот“, соопшти СВР Охрид.
Упатен е апел до сите граѓани строго да ги почитуваат одлуките на Владата за забрана за движење, како и дисциплинирано да се придржуваат до сите препорачани мерки во врска со спречувањето на ширењето на корона вирусот. Во спротивно, ќе се изрекуваат санкции согласно член 205 и 206 од Кривичниот законик.
