Американската администрација побара од Јапонија да пренасочи дел од течниот природен гас во Европа во случај на евентуален прекин во снабдувањето со гас од Русија, објави јапонската новинска агенција Џиџи.
Јапонија, клучен увозник на течен природен гас (ЛНГ), ќе ги разгледа начините како може да и помогне на меѓународната заедница во случај проблем со залихите поради украинската криза, изјави министерот за индустрија Коичи Хагиуда.
Тој одби да ги потврди медиумските извештаи дека САД побарале од Јапонија да пренасочи дел од својот гас во Европа доколку Русија го прекине снабдувањето, велејќи дека не може да коментира за дипломатската кореспонденција.
Хагиуда на прес-конференција рече дека Јапонија со години е „движечка сила во развојот на пазарот на течен гас“, додавајќи дека Токио сака да размисли како може да придонесе за меѓународната заедница.
Во исто време, сепак, тој предупреди дека Јапонија, чии енергетски ресурси се сиромашни, прво ќе мора да обезбеди доволно енергија за себе за да избегне недостиг на електрична енергија, бидејќи синоптичарите предвидуваат постудено време.
„Ќе видиме дали може да се направи нешто откако ќе се осигураме дека нема да се влијае на секојдневниот живот на луѓето“, рече тој.
Ситуацијата во Украина значително се одрази на стабилното снабдување со енергија на Јапонија, така што земјата внимателно ќе ја следи состојбата, додаде Хагиуда.
Зголемените тензии меѓу Русија и Западот околу Украина ги зголемија стравувањата дека снабдувањето со енергија на Европа може да биде нарушено.
Соединетите Американски Држави, водечки светски производител на течен природен гас, минатата недела побараа од Катар и другите големи производители на енергија да ја истражат можноста за снабдување на Европа доколку испораките од Русија бидат прекинати како резултат на украинската криза.
