Руските и турските трупи спроведоа заедничка патролна мисија во сириската провинција Ал Хасака во согласност со меморандумот усвоен од претседателите на Русија и Турција, изјави офицер од рускиот Центар за помирување на спротивставените страни во Сирија, Александар Казаков, пренесува ТАСС.
„Уште една руско-турска патрола беше спроведена во согласност со меморандумот од 2019 година. Беше извршена контрола во пет населени места, трасата на патролата беше долга 55 километри“, рече Казаков.
Патролата вклучувала два руски хеликоптери „Мил Ми-8“. Целта на мисијата била да се осигураат дека нема курдски единици на милицијата долж турската граница затоа што според меморандумот тие треба да се држат надвор од тампон зоната од 30 километри. Откако мисијата завршила, руските и турските воени офицери одржале консултации за трасата на следната заедничка патрола.
На 22 октомври 2019 година, рускиот претседател Владимир Путин и неговиот турски колега Реџеп Таип Ердоган усвоија меморандум за заеднички активности насочени кон решавање на ситуацијата во североисточна Сирија. Според документот, руската воена полиција и сириските трупи се распоредени во области соседни на турската безбедна зона.
Руските и турските трупи започнаа заеднички патроли источно од реката Еуфрат на 1 ноември. Покрај тоа, Москва и Анкара на 5 март 2020 година се согласија дека ќе биде прогласен прекин на огнот во Идлиб и ќе бидат преземени голем број други мерки за подобрување на ситуацијата во покраината.
