Руското Министерство за надворешни работи денеска објави дека во реципрочен потег протерала тројца словачки дипломати, пренесува „Анадолија“.
Одлуката му била пренесена на словачкиот амбасадор во Русија, Петер Припутен, се вели во соопштението на Министерството за својата официјална веб-страница.
„На 31 август, руското Министерство за надворешни работи го повика амбасадорот на Словачката Република во Руската Федерација, Петер Припутен, за да му изрази силен протест за неоправданото протерување на тројца дипломатски службеници на руската амбасада во Словачка во август годинава“, се вели во извештајот.
Москва го смета чекорот од Братислава за непријателски и „спротивен на традиционалниот дух на конструктивен развој на односите меѓу нашите земји“, додаде тој.
На 11 август, Словачка протера тројца вработени во руската амбасада во главниот град Братислава. Локалната телевизија „Маркиза“ тврди дека дипломатите биле протерани затоа што станува збор за разузнавачи кои работеле тајно.
