Барселона, 9 мај 2020 (МИА) – Играчот од средниот ред на шпанскиот шампион Барселона – Иван Ракитиќ, конечно стави крај на шпекулациите и ја откри својата иднина.
Хрватот постојано е поврзуван со голем број европски гиганти, но признава дека сака прво да го исполни договорот со Каталонците.
– Јас сè уште имам договор до 2021 година и кога ќе потпишам, секогаш имам намера да го испочитувам мојот договор до крајот. Ако поради некоја причина не можам да го исполнам, седнуваме и разговараме. Но, за сега, јас сум многу среќен во Барселона. Јас сум навикнат да слушам шпекулации. Јас сум во овој клуб веќе 6 години и така е секоја сезона. Понекогаш се потсетувам дека фудбалот е само спорт и понекогаш е подобро да се смеам на тоа, ги прокоментира Хрватот гласините за трансферот.
