Скопје, 14 февруари 2020 (МИА) – Во речиси празна сала, Собранието, по паузата, во 19:00 часот ја продолжи расправата за законот за јавно обвинителство.
Лилјана Затуроска од ВМРО-ДПМНЕ, која прва зема збор, истакна дека овој пратенички состав ќе биде запамтен по носењето уште еден монструм, поголем од СЈО.
-Тој монструм ќе работи според потребите и желбите на мафијата во државата. Со ова, ќе ги ставите граѓаните во многу сериозна, незавидна пложба, да бидат мета на мафијаши, рече Затурсока и предложи повлекување на законското решение со цел негова доработка.
Во расправата пред пауазата, пратениците ги повторија своите ставови: владејачкото мнозинство дека донесувањето на законот за ЈО ќе значи почеток на борбата против корупцијата и криминалот, а ВМРО-ДПМНЕ дека законот се турка со сила и противуставно, само за да се спасат Заев и други владини функционери од одговорност. Единствено нов беше предлогот на Даниела Рангелова од ВМРО-ДПМНЕ која апелира, секој што е засегнат во некои од судските случаи, истражни или предистражни постапки, да не влегува во расправа за законот.
Претседателот на Собранието Талат Џафери пред паузата во 18.00 часот, рече дека Собранието од 19:00 ќе продолжи со работа без прекин, додека не биде распуштено. мч/скс/
