Македонска Каменица, 9 мај 2020 (МИА) – Во Македонска Каменица вечерва ќе се одржи првиот концерт како дел од настанот ,,Култура во време на корона“. Според информациите на Горан Огнановски, директор на Културно-информативниот центар „Романса” кој е организатор на настанот се работи за концерт што ќе биде пренесуван во живо во времето на полицискиот час.
-Концертот е предвиден во централното градско подрачје кај паркинг просторот на улица „Рударска“, а целта е да им се овозможи на што поголем број граѓани да го следат настапот од своите балкони, вели Огнановски.
Додаде дека концертот поради вирусот Ковид-19 ќе се одржи без класично присуство на публика.
-Почетокот е закажан еден час по започнувањето на полицискиот час и ќе биде директно пренесуван на официјалниот фејсбук профил на Општина Македонска Каменица и на јутјуб каналот на локалниот електронски медиум (каменица.мк), додава Огнановски.
Претходно, Културно-информативниот центар „Романса“ објави повик до локалните уметници и музичари кои во овој период останаа без ангажман, да учествуваат на настанот, со цел да ја доближат културата до граѓаните, во време на потребно социјално дистанцирање поради појавата на коронавирусот. вс/скс/
